ശനി : ഓനീസാ ദ്മൌത്വ ( നിശാ ഗീതം) Leliya

ശനി : ഓനീസാ ദ്മൌത്വ ( നിശാ ഗീതം)

(രീതി : ദവ്റെശ്  ക്സാവേ ..ക്സവാ ..റംബാ )

അവൻ സഭ ശരീരത്തിന്റെ ശിരസാകുന്നു . Col. 1/18

കാണ്മൂ ബലിപീടത്തിന്മേൽ
പാപം കഴുകും നിണമൊഴുകും
മോഹന ദിവ്യരഹസ്യം ഞാൻ .

സ്നേഹത്തിൽ നാം മിശിഹായിൽ
ഒന്നായി തീർന്നു വസിച്ചിടുകിൽ
അവനിൽ നിന്നു കിരീടം നാം
അണിയും ശാശ്വത ലോകത്തിൽ.

അംഗഗണത്താൽ പൂരിതമാം
മൌതികമാമീ ഗാത്രത്തിൻ
ശിരസ്സായ് നിത്യം ശോഭിപ്പൂ
നിത്യപിതാവിൻ പ്രിയപുത്രൻ .

കർത്താവേ ഞാൻ നിന്നിൽ ശരണപ്പെട്ടു .  Ps. 31/6

നാഥാ , സ്ഥിര വിശ്വാസമോടെ
നിൻപദമണിയും നരരാരും.
ദു:ഖിതരായി മടങ്ങില്ല .

നിൻമുഖകാന്തി നുകർന്നീടാൻ
അത്തിമരത്തിലിരുന്നോരാ
സക്കൈ തന്നുടെ ഭവനത്തിൽ
നീ പോയി ശാന്തി പകർന്നരുളി .

വിശ്വാസത്താൽ പ്രേരിതനായ്
ക്രൂശിൽ നിന്നെ വിളിച്ചവനാം
കള്ളനു ഭാഗ്യം നല്കിയ നീ
ഞങ്ങളിലും കൃപ ചൊരിയണമേ .

നിന്റെ വലതു കരത്താൽ  എന്നെ രക്ഷിക്കണമേ   Ps. 60/5

എന്നും കൃപയുടെ ഉറവാകും
കര്ത്താവേ , നിൻ വലതുകരം
ഞങൾക്കാശിസരുളട്ടെ .

തൃക്കൈകൊണ്ട് മെനഞ്ഞവരെ
ശത്രുകരങ്ങളിലേ കരുതേ .
അവനിയിൽ ഞങ്ങൾക്കാശ്വാസം
നിത്യം പകരണമേ ,നാഥാ

"ലോകാന്ത്യം വരെയെന്നും ഞാൻ
നിങ്ങളൊടോത്തു  വസിച്ചീടും "

ഏവം നൽകിയ വാഗ്ദാനം
ഞങ്ങൾക്കാശ്രയമരുളുന്നു .

പിതാവിനും പുത്രനും പരിശുദ്ധാമാവിനും സ്തുതി

ദൈവം നൽകിയ ദാനത്താൽ
കർത്താവിൽ നാം രക്ഷിതരായ്
നന്ദിനിറഞ്ഞു നമിക്കുന്നു .

മിശിഹാ നാഥൻ വരുവോളം
പ്രത്യാശക്കൊരു വഴിയന്യേ
നിയമത്താലേ തിരസ്കൃതരായ്
നമ്മൾ ഭൂവിലലഞ്ഞെന്നും .    Eph. 2/8-12

കർത്താവിൻ തിരുരക്തത്താൽ
നാമിന്നവനു സമീപസ്തർ
നിത്യപിതാവിൻ സന്നിധിയിൽ
നമ്മെയണച്ചതുമവനല്ലോ .